Piquete das temporais do Consorcio IeB nas medallas Castelao

• As traballadoras temporais do Consorcio Galego de Servizos de Igualdade e Benestar reclaman os seus dereitos fronte a Feijóo
• Esta mobilización marca a nova estratexia das traballadoras para que a Xunta e a Xerencia do Consorcio senten a negociar
• Haberá novas mobilizacións para reclamar a paralización do ERE de mulleres que está a preparar a Xunta

Este luns 28 no acto de entrega das medallas Castelao da Xunta de Galicia en Compostela as traballadoras do Consorcio Galego de Servizos de Igualdade e Benestar volveron defender os seus postos de traballo.

As traballadoras convocadas pola CNT protestaron ás portas do pazo de congresos de Compostela por volta de 3 horas e fixéronse sentir diante de autoridades e homenaxeadas no acto institucional con berros de “Feijóo escoitas tes o consorcio en loita” ou ”Non ao ERE de mulleres”.

Ben preto sentiron os berros na súa entrada a Conselleria de Política Social, e un apurado presidente Feijóo que xa non se deixóu ver á saída do acto. A animada concentración fai parte da estratexia posta en marcha desde a Sección sindical de CNT no Consorcio galego IeB de incrementar as protestas na rúa para dar visibilización á súa problemática laboral.

Desde CNT anúncianse novas mobilizacións toda vez que Xunta e xerencia do Consorcio fan caso omiso das xustas peticións de diálogo solicitadas polas traballadoras. A seguinte protesta será este mesmo mércores 30 ás 19h diante da Delegación do goberno en A Coruña coa convocatoria a nivel estatal de protesta contra a reforma do EBEP que pretende o Ministro Iceta.